حمو النيــــــــــل.. كيف نريّح الطفل من الحكة والسخانة؟
مع السخانة والرطوبة العالية الأيام دي، أطفال كتير بيظهر ليهم طفح جلدي أحمر وحبيبات صغيرة مزعجة جداً بتخليهم يحكوا ويبكوا باستمرار.. ده اللي بنسميهو "حمو النيــــــــــل" (Miliaria).
ليه بيحصل حمو النيل؟
طبياً، الفكرة ببساطة إنو مسامات الغدد العرقية (Sweat Ducts) بتتقفل بسبب العرق الزايد، فالعرق بيتحبس تحت الجلد وبيعمل الالتهاب والحبوب الحمراء دي.
أخطــــــــــاء شائعة بتزيد المشكلة:
أكبر غلطة بنعملها هي مسح جسم الطفل بزيوت تقيلة، فازلين، أو كريمات مرطبة كثيفة. الحاجات دي بتقفل المسامات أكتر (Pore occlusion) وبتزيد الحكة والالتهاب بدل ما تعالجو! وبرضو تلبيس الطفل ملابس داخلية نايلون أو طبقات كتير.
الحــــــــــل والخطوات الطبية الصحيحة:
* الملابس: لبّسوا الطفل ملابس قطنيــــــــــة 100% خفيفة وواسعة عشان تمتص العرق وتسمح بتهوية الجلد.
* الاستحمام: حمموا الطفل بموية فاترة أو باردة شوية عدة مرات في اليوم عشان نبرد الجلد ونفتح المسامات.
* التهوية: خلوا الطفل في مكان بارد ومهوى كويس (مروحة أو مكيف).
* العلاج الموضعي: استخدموا (لوشن الكالاميــــــــــن - Calamine Lotion) بمسحة خفيفة على أماكن الحبوب، لأنو بيهدي الحكة جداً وبينشف الحبوب.
متيــــــــــن نستشير الطبيب؟
حمو النيل العادي بيروح بالخطوات الفوق دي، لكن لو لاحظتي إنو الحبوب عملت صديد (قيح)، أو الالتهاب زاد شديد، أو الطفل ظهرت ليهو حمى (Fever).. هنا لازم فحص طبي لأنو ممكن يكون حصل التهاب بكتيري ثانوي (Secondary Bacterial Infection).
صيف وخريف بارد وصحي على أطفالنا.. شاركي المعلومة مع الأمهات عشان نريّح أطفالنا من إزعاج حمو النيل.
د. عمــــــــــر السنــــــــــي