تأخر النطق عند الأطفال متى يعتبر مشكلة محتاجه إلى الطبيب

ليه بيحصل تأخر الكلام؟
طبياً، تأخر النطق (Speech Delay) عند الأطفال ممكن يكون لأسباب بسيطة زي قلة التواصل معاه، وممكن يكون مؤشر لمشاكل أكبر زي ضعف السمع (Hearing loss)، أو طيف التوحد (Autism Spectrum)، أو تأخر في التطور العصبي.
أخطــــــــاء شائعة بتزيد المشكلة:
أكبر غلطة بتدمر لغة الطفل هي تركه لساعات طويلة أمام الشاشات (التلفزيون، التلفون، قنوات طيور الجنة وغيرها). الشاشات بتخلي الطفل "متلقي سلبي" وما بتديهو فرصة للممارسة والتفاعل.
الغلطة التانية هي الاستجابة لإشارات الطفل قبل ما يحاول ينطق الكلمة (يعني يأشر على الموية تديهو ليها طوالي بدون ما تطلب منو يحاول يقول الكلمة).
الحــــــــل والخطوات الطبية الصحيحة:
- المنع التام للشاشات: للأطفال تحت عمر سنتين، المنع لازم يكون قاطع.
- التواصل المستمر: اتكلمي مع طفلك طول اليوم، اشرحي ليهو بتعملي في شنو، واقري ليهو قصص بصوت واضح ومخارج حروف صحيحة.
متيــــــــن نستشير الطبيب؟
التأخر في الكلام ما مفروض نتجاهلو أبداً. لو طفلك:
- وصل عمر 12 شهر وما بيناغي.
- وصل 18 شهر وما بيقول كلمات مفردة واضحة (غير بابا وماما).
- وصل سنتين وما بيقدر يركب جملة من كلمتين.
- أو لو لاحظتي إنو تواصلو البصري ضعيف وما بينتبه لاسمُه.
هنا التقييم الطبي المبكر (واللي بيبدأ غالباً بفحص الأذن واستبعاد ضعف السمع) بيصنع فارق كبير جداً في العلاج.